اقتصاد پوهنځی

اقتصاد پوهنځی د کاروباري مديريت په نوم يواځې يو ډيپارټمنټ لري.

لرليد او رسالت

لرليد:

اقتصاد پوهنځی غواړي ټولنې ته داسې اشخاص وروزي، چې په کاروباري مديريت کې په نظري او عملي توګه د اړينو مسلکي مهارتونو په لرلو سره د هيواد د پرمختګ سبب شي.

 رسالت:

اقتصاد پوهنځی د کاروباري مديريت په برخه کې د عملي او نظري زده کړو ترڅنګ په مسلکي مهارتونو سمبال داسې محصلين روزي، چې د څېړنې تر سره کولو، مدیریت او رهبرۍ وړتياوو په لرلو سره د کار بازار غوښتنې پوره کړای شي.

زده کړیيز اهداف

۱. د مديريت او رهبرۍ په اساساتو پوهيدل

۲. د ادارې او تجارت اړوند موضوعاتو په هکله ټوليز او مفصل معلومات درلودل

۳. د حسابدارۍ، بشري سرچينو مديريت او بازار موندنې اړوند نظري پوهه او مسلکي مهارتونه درلودل

۴. د هر ډول پلانونو جوړولو، تطبيقولو او ارزوونې وړتيا درلودل

۵.  کاري ساحه کې په انفرادي توګه او په کاري ټيم کې د فعال غړي په توګه د کاري اهدافو ترلاسه کولو وړتيا درلودل

۶.  د سوداګرۍ او سوداګريزو مارکېټونو د وضعيت تحليلولو وړتيا درلودل

۷. د ادارې او مديريت اړوند پیژندل شويو کړنو په هکله معلومات درلودل

۸. د حسابدارۍ او بشري سرچينو مديريت په برخو کې د نورو لوړو زده کړو وړتيا درلودل

کريکولم (تحصيلي نصاب)

د علمي معاونيت په رهبرۍ د تحصيلي نصاب اصلي کمېټې له لوري د ټولو پوهنځيو تحصيلي نصابونه په ۱۳۹۸ لمريز کال کې د پنځه ګونو سروی ګانو پر اساس د کار بازار د غوښتنو په پام کې نيولو سره مهالني او اصلاح شوي دي. پر لاندې ذکر شويو سروې ګانو سربېره، د تحصيلي نصاب پرمختيا او مهالني کولو په موخه د استادانو او محصلينو سره ازاد بحثونه هم تر سره شوي دي.

1. د ګومارونکو ادارو سروی
2. د بهرنيو علمي کدرونو سروی
3. د فارغانو سروی
4. د پوهنځي موجوده محصلانو سروی
5. د پوهنځي د موجوده استادانو سروی

د محصلينو کاروباري مشاهدات

د اقتصاد پوهنځي محصلان د پوهنځي رياست په مرسته د اړوندو لارښود استادانو په ملتيا په ننګرهار ولايت کې د کاروباري واحداتو (بانکونه، فابريکې، خدماتي او توليدي شرکتونه، مؤسسات او نورې اړونده ادارې) څخه په دوامداره توګه د پوهنځي د ساحوي کتنو او عملي کارونو پلان پر اساس کتنې کوي، دوی په کاري ساحه کې د کاروبارونو، توليد، محاسبوي سستمونو، اداري اجراءاتو، خدماتو عرضه کولو او نورو برخو په هکله کتنې کوي. د اقتصاد پوهنځی محصلانو د ساحوي کتنو انځورونه لاندې د بېلګې په توګه ښودل شوي دي.

سمینارونه/ورکشاپونه

د مسلکي پرمختيا مرکز (PDC) د اقتصاد پوهنځي رياست په سلا مشوره، د محصلينو او استادانو د اړتيا ارزوونې پر اساس، محصلانو او استادانو ته علمي سمينارونه، ورکشاپونه او روزنيزې برنامې دايروي. ډېری علمي سمينارونه او ورکشاپونه د پوهنخي استادانو له لوري محصلانو ته وړاندې کيږي. ځينې ورکشاپونه د بهرنيو ټرېنرانو، تجربه لرونکو مسلکي اشخاصو له لوري هم وړاندې کيږي.